LOCUTORIUM
Felici cursu in locutorium Circuli Latini Panormitani pervenistis, in locutorium primum totius terrarum orbis in quo Latine loquendum sit! Hic aliis hospitibus obviabis quibuscum tamquam cum praesentibus colloquaris. Numquam tam facile fuit, celere atque iucundum Latine loqui.
Ut consortii nostri particeps fias, satis est ut subnotes. Si nomen iam dedisti, locutorio statim uti poteris, aliter nexus tibi deprimendus erit quo ad subscriptionis scidulam pervenias. Agnomen quodlibet tibi eligas oportebit quod nemo prius sibi elegerit et signum quod arcanum maneat, inscriptio quoque electronica tua loco apto erit describenda; turpia scilicet non admittentur. Si quid est de Locutorii usu quod minime liqueat, paginam auxiliarem quaesumus inspicias, quam evolvere poteris si ad pedem huius paginae verbum "explicatio" muris ictu tetigeris.
Locutorium semper patet ad confabulatores excipiendos. Sciatis tamen oportet, praesertim si hic nemini occurristis, a CLP sodalibus binas invitationes in hebdomada proponi, diebus Lunae et diebus Veneris hora decima post meridiem, qua hora, si nulla obstiterit calamitas, sollemniter spondemus nos adfore vehementerque speramus plures semper huc undique collocutores ad colloquium conventuros.
Horas ita indicavimus ut Romae, in urbe omnium nostrum, unde mirabilis Romanorum sermo in multas gentes manavit, tempus supputare solemus. At, cum non omnibus eadem sit hora, hic quaeso colloquiorum conspectum brevem inspicite. Confabulationes ergo habebuntur:
- die Lunae hora decima (Romae, Londinii nona, Novi Eboraci quarta, Costantinopoli undecima pariter postmeridiana, Moscoviae media nocte).
- die Veneris hora decima (Romae, Londinii nona, Novi Eboraci quarta, Costantinopoli undecima pariter postmeridiana, Moscoviae media nocte).
Locutorium nostrum speramus vobis iucundum fore!
|
