Circulus Latinus Panormitanus

EVENTA

2010		2009		2008		2007		2006		2005		2004		2003		2002

CONVENTUS IN ANNUM MMIV^UM INDICTI

SEMINARIA LATINA HISPANICA anno hoc felicissimo duo erunt a peritissimis indicta doctoribus. Prius postridie kalendas aperietur, finietur vero a. d. VII^um idus Februarias (2-7.II), moderantibus doctore P. C. Eichenseer et doctrice S. Albert; alterum ab idibus Martiis ad diem XIII^um a. kalendas Apriles (15-20.III) moderante professore M. von Albrecht celebrabitur. Habebitur utrumque in Matritensi universitate studiorum San Pablo-CEU. Cuius conventus sedes in interrete haec est; praeconium ipsum hic inspicite.

L.V.P.A.e BIDUUM XXIV^um habebitur idibus Mais et postridie (15-16.V) in instituto c. n. LVHS Freckenhorst (prope Monasterium). De re nondum constitutum est. Interroganda est Lupae moderatrix Inga Pessarra Grimm. Plura vero in ipsa sede Lupana hic cognoscatis.

AESTIVA ROMAE LATINITAS, id est cottidianae praelectiones quibus P. Reginaldus Foster OCD, ab epistulis Summi Pontificis, discipulos Latine docebit, in monte Ianiculo, iuxta ecclesiam Sancti Pancratii, a. d. VII^um idus Iunias inchoabitur et postridie kal. Augustas finietur (7.VI-31.VII). Interrogandus est ipse moderator P. Reginaldus Foster OCD, Piazza S. Pancrazio 5A, I-00152 Roma (tel. ++39/06/58540206). Nonnulla etiam scitu digna enarrat optima discipula in pagina hac.

SYMPOSIUM LATINUM quod instituet Fundatio Melissa in Galliae oppido amoenissimo Rocamadour habebitur a die XV° ad VIII^um ante kal. Aug. (18-25.VII). Quo loco participibus dabitur occasio sermonis exercendi et de variis argumentis disputandi. Multa hic accuratissime descripta sunt, reliqua vero ab ipso moderatore sciscitari vobis licebit.

SEMINARIUM HELVETICUM Societatis Latinae Saravipontanae Morsaci in Helvetia moderante doctore P. Caelesti Eichenseer, adiutoriam suppeditante operam doctrice Sigride Albert, a die VIII° ad II^um ante (pridie) kal. Aug. (25-31.VII) celebrabitur. Scribant quicumque participare cupiunt, si serissime duobus mensibus ante initium, ad Societatem Latinam, Universität - FR 5.2, Postfach 151150, D-66041 Saarbrücken. Qua de re paginam hanc inspicere oportebit.

FERIAE LATINAE TINIENSES in aprica Carinthia celebrabuntur a die VII° ad III^um a. kalendas Augustas (26-30.VII), haud longe ab urbe Aquilavico (vulgo Klagenfurt). Conventum ex integro Latine habendum, moderatoribus doctore Felice W. Kucher et P. Christiano Brandstaetter, hic Slovenice et Germanice breviter descriptum videbitis et ad nomen dandum scidulam invenietis.

FERIAE LATINAE FERIGOLETENSES in deversorio abbatiae Sancti Michaelis Ferigoletensis, haud longe ab urbe Avennione, die V° a. kalendas inchoabuntur et pridie nonas Augustas absolventur (28.VII-4.VIII). De hac re si plura comperire vis, ad ipsum moderatorem scribas Ioannem Claudium Champeau, 121 chemin des Moulins superieur, F-06510 Gattières (tel. +33/493/291702).

SEPTIMANA LATINA AMOENEBURGENSIS XVI^a Amoeneburgi videlicet, haud longe ab urbe Marburgo, kalendis Augustis inchoabitur et a. diem VII^um idus Augustas (1-7.VIII) finietur. Moderabuntur Thomas Gölzhäuser, Mechtilda Hofmann, Vulframus Bohmhammel, professor doctor Nicolaus Sallmann, Nicolaus Bottler, Conradus Hille. Qua de re paginam hanc interretis Anglicam aperiatis vel ipsam scidulam exarandam vel interrogandi causa hac inscriptione electronica utamini.

CONVENTICULUM AESTIVUM LEXINTONIENSE QUARTUM in studiorum universitate Kentuckiana moderante professore Terentio Tunberg die IV° a. nonas incohabitur et die III° a. idus Augustas finietur (2-11.VIII). Qui plura de hac re cupiant comperire, paginam hanc Latinam interretis aperiant. Dies vero Anglice tantum hic indicati sunt. Qui vero nomina sua dare cupiant, ad ipsum moderatorem professorem Tunberg scribant.

L.V.P.A.e SEMINARIUM SINGIDUNENSE in capite videlicet Serbiae postridie nonas Augustas incohabitur et a. d. XVII^um kalendas Septembres (6-16.VIII) finietur. Qua de re sedem Lupanam inspicite, scribite vero ad moderatricem Ingam Pessarra Grimm.

SEMINARIUM BELGICUM Societatis Latinae Saravipontanae in abbatia Maredsolensi, quae haud multum distat ab urbe Namurco, moderante doctore P. Caelesti Eichenseer, adiutoriam suppeditante operam doctrice Sigride Albert, a die VI° ante idus Augustas ad XIX^um ante kal. Septembres celebrabitur (8-14.VIII). Quod qui participare cupiunt, scribant ad Societatem Latinam, Universität - FR 5.2, Postfach 151150, D-66041 Saarbrücken. Qua de re paginam hanc inspicere oportebit.