|
|
|
|
|
|
EVENTA
CONVENTUS IN ANNUM MMIIUM INDICTI
CONVENTICULUM BRASILIANUM. Myrna Appel et Eduardus Engelsing docti Latinitatis cultores conventiculum Brasilianum primum indixerunt Sancti Leopoldi in civitate quae Flumen Magnum Meridianum vocitatur (vulgo Rio Grande do Sul) tempore Paschali anni MMIIi habendum. Conventiculum hoc omnium gentium, quod pridie idus Apriles inchoabitur et ante diem XVIIum kal. Maias finietur (12-15 mensis Aprilis), ad id tendit, ut usus vivus Latini sermonis inter incolas Americae meridionalis iterum instauretur et vigeat. De hoc incepto maximis laudibus digno interrogandus est professor Eduardus Engelsing.
OFFICINA POETICA LATINA in Polonia habebitur ad Lapidem Magnum, non longe a Silesiaca urbe Opolia (Opole/Oppeln), ab idibus Iuliis ad diem XIIIum ante kalendas Augustas (id est a Saturni die 13° ad Saturni diem 20um mensis Iulii), moderante Anna Elissa Radke poetria doctissima. Intererunt viri mulieresque artis poeticae peritissimi, quos inter annumerantur professores doctoresque Josepus Mantke Vratislaviensis, Wolfgangus Huebner Monasteriensis, Fidelis Raedle Gottingensis, Theodoricus Sacré Lovaniensis, Alfonsus Weische Monasteriensis, Winfridus Czapiewski Oberhusiensis, Beata Czapla Bonnensis, Sbigneus Kadlubek Cattowicensis, Carolus Augustus Neuhausen Bonnensis, Helgus Nikitinski Moscoviensis, Joanna Rostropowicz Opoliensis, necnon, praeter moderatricem ipsam, poetae Gerardus Allesch, Marcus Moscowitz, Fidelis Raedle, Alanus Van Dievoet, qui praelectiones, seminaria, carminum recitationes habebunt. Qua de re ipsa moderatrix Anna Elissa Radke interroganda est.
CONVENTICULUM AESTIVUM LEXINTONIENSE ALTERUM in studiorum universitate Kentuckiana moderante professore Terentio Tunberg a die XIV° ad IVum ante kal. Aug. (id est a Veneris die 19° ad Lunae diem 29um Iulii) celebrabitur. Qui plura de hac re cupiant comperire, paginam hanc interretis aperiant et ad ipsum scribant moderatorem.
SEMINARIUM HELVETICUM. Societatis Latinae Saravipontanae Morsaci in Helvetia moderante doctore P. Caelesti Eichenseer, adiutoriam suppeditante operam doctrice Sigride Albert, a die XII° ad VIum ante kal. Aug. (id est a Dominico die 21° ad diem Sabbati 27um Iulii) celebrabitur. Scribant quicumque participare cupiunt, si serissime duobus mensibus ante initium, ad: Societatem Latinam, Universität - FR 5.2, Postfach 151150, D-66041 SAARBRÜCKEN.
SEPTIMANA LATINA AMOENEBURGENSIS XIVa Amoeneburgi videlicet, haud longe ab urbe Marburgo, a die V° ante kal. ad diem IIIum ante nonas Aug. (id est diebus Dominico 28° Iulii - Sabbato 3° Augusti) celebrabitur moderatoribus Thoma Gölzhäuser, Mechtilda Hofmann, Vulframo Bohmhammel, professore Nicolao Sallmann, Nicolao Bottler, Conrado Hille. Qua de re paginam hanc interretis Anglice exaratam aperiatis vel interrogandi causa hac inscriptione electronica utamini.
SEMINARIUM ERYCINUM ALTERUM. Domus Latina Bruxellensis promovente et adiuvante Circulo Latino Panormitano seminarium Erycinum alterum indicet in monte Sancti Iuliani, olim Venereo, qui non multum distat a Siciliensi urbe Drepano, aestate anni MMIIi habendum. Quod seminarium pridie nonas Augustas incohabitur et a. d. IIIum idus Aug. finietur (celebrabitur ergo a Dominico die 4° ad Dominicum diem 11um Augusti). De hac re si plura comperire vis, hic tangas.
SEMINARIUM BELGICUM. Societatis Latinae Saravipontanae verisimiliter in abbatia Maredsolensi, quae haud multum distat ab urbe Namurco, moderante doctore P. Caelesti Eichenseer, adiutoriam suppeditante operam doctrice Sigride Albert, a. d. XIIum incohabitur et a. d. VIum kal. Sept. finietur (celebrabitur ergo a die Mercurii - seu feria quarta - 21° ad diem Martis - seu feria tertia - 27um Augusti). Quod qui participare cupiunt, scribant ad: Societatem Latinam, Universität - FR 5.2, Postfach 151150, D-66041 SAARBRÜCKEN.
X ACADEMIAE LATINITATI FOVENDAE CONVENTUS omnium gentium, quem totus orbis Latinus avidissime exspectat, cui titulus duplex De lingua Latina communicationis inter Europaeos instrumento a XV° usque ad XXIum saeculum -- De inceptis hodiernis institutionis Latinae renovandae ac vivae Latinitatis fovendae, Matriti habebitur in aedibus Universitatis Sancti Pauli - CEU a die Lunae II° usque ad diem Sabbati VIIum mensis Septembris (id est a die IV° ante nonas ad diem VIIum ante idus Septembres) huius anni MMIIi. Conventus moderator est arch. Dom. Antonius Capellán García, acroases vero habebunt professores academici et Latinitatis cultores peritissimi ex omnibus gentibus, quos inter B. LUISELLI, Academiae Praeses, M. von ALBRECHT, J. M. BLANCH, V. CRISTÓBAL, C. EGGER, C. EICHENSEER, I. MAZZINI, M. MINKOVA, G. MORRISH-TUNBERG, E. PALMÉN, T. PEKKANEN, F. RÄDLE, D. SACRÉ, W. STROH, T. TUNBERG. Quibus de rebus conventus ipsius sedem interretialem adire vobis licet vel ad ipsum moderatorem sub inscriptione hac vestras mittere epistulas: Dom. Antonius Capellán García, X ALF Conventus Moderator, Universitas San Pablo - CEU Avenida del Valle, 21. 28003 Madrid - ESPAÑA
|
|
|
|
|
